Hindistanın şimal regionlarında elektrik enerjinin təchizatında milyonlarla insana əzab verən görünməmiş istilərin səbəb olduğu ciddi fasilələr müşahidə olunur. Mühəndislər vəziyyəti daha da gərginləşdirə biləcək elektrik enerjisinin mümkün uzunmüddətli kəsintiləri ilə əlaqədar xəbərdarlıq edirlər.
AZƏRTAC xarici mediaya istinadla xəbər verir ki, davam edən istilər səbəbindən elektrik enerjisinə olan tələbat kəskin şəkildə artıb: ventilyatorlar, soyutma cihazları və kondisionerlər tam gücü ilə işləyir, bu da Yeni Dehlidə və digər şimal regionlarında elektrik şəbəkələrinə ciddi yük yaradır. Kondisioner və soyutma cihazları istehsalçıları ötən illə müqayisədə satışda 40-50 faiz artım olduğunu qeyd edirlər.
Pencab şimal ştatında elektrik enerjisi istehlakı bu ay ötən ilin eyni dövrü ilə müqayisədə 43 faiz artıb. Hindistan Energetiklər Federasiyası hökumətə məktub göndərərək xəbərdarlıq edib ki, vəziyyət gündən-günə daha ciddiləşir və Pencabın şəbəkəsindəki kəsintilər bütün ölkə üzrə zəncirvari reaksiyaya səbəb ola bilər.
Federasiyanın məlumatında deyilir ki, vəziyyət belə davam edərsə, şəbəkənin işinin pozulması ehtimalı yüksəkdir.
Elektrik enerjisinə olan tələbatın artması iyun ayında İndira Qandi adına Hava Limanında sərnişinlərin qeydiyyatını və təyyarəyə minməsini dayandıran, bir saat davam edən nasazlıq da daxil olmaqla, bütün regionda fasilələrə gətirib çıxarıb. Həddindən artıq qızan elektrik cihazları qısa qapanmalara səbəb olaraq, mağazalarda və yaşayış binalarında yanğınlara səbəb olub.
Mayın ortasından Hindistanın əksər hissəsini ifrat istilər bürüyüb. Təxminən 33 dərəcəlik gecə temperaturları istirahət etməyə şans buraxmır.
Çoxillik elmi tədqiqatlar göstərir ki, iqlim böhranı istilik dalğalarını daha uzunmüddətli, mütəmadi və intensiv edir.
Açıq havada işləyən insanlar – küçə ticarəti ilə məşğul olanlar, polis əməkdaşları, mühafizəçilər, kuryerlər, rikşa sürücüləri və inşaatçılar üçün xüsusilə çətindir. Onların yaşadıqları yoxsul rayonlar su çatışmazlığından əziyyət çəkir ki, bu da ağır şəraiti daha da çətinləşdirir.
İmkanları olanlar Yeni Dehli və düzənlik ərazilərdən sərin dağ rayonlarına köçürlər. Lakin hətta orada da anomal yüksək temperaturlar meşə yanğınları və su çatışmazlığına gətirib çıxarıb. Populyar dağ şəhərlərində mehmanxana sahibləri böyük çənlərdə su sifariş edirlər, çünki su kranları quruyub. Qonaqlar getdikcə daha çox kondisionerlərin olması ilə maraqlanır, bundan əvvəl isə bu görünməmiş bir hadisə idi.
